Leierskapsontwikkeling – ’n kritieke behoefte in die Kerk in Afrika

Bekele Shanko is in ’n Etiopiese gesin op die platteland gebore. Bekele se pa het die duiwel aanbid, alkohol misbruik en sy drie vroue mishandel. Op vierjarige ouderdom is Bekele amptelik aan Satan opgedra vir ’n leeftyd van diens aan hom en om sodoende in sy pa se voetspore te volg.

Maar God het ’n ander plan vir Bekele se lewe gehad. Met geen kerk of Christengetuienis in sy omgewing nie, is Bekele deur ’n reeks wonderlike gebeure tog aan die boodskap van die Evangelie blootgestel. Hy is deur die lewende Christus verander en word tans kragtiglik deur God gebruik om hoop en genesing in Afrika te bring. Ten spyte van sy skerp intellek en dappere geloof, is Bekele ook diep nederig en afhanklik van die Here wanneer hy ondersoekende vrae stel en sy diepe hartsverlange uitspreek om as Christenleier te ontwikkel.

Om hierdie rede plaas TWR klem op die belangrikheid van leierskapsontwikkeling in die toekoms. Ons is bevoorreg om betrokke te wees by die versnelde ontwikkeling van leiers wat dissipels van die nasies sal maak. TWR is vasberade om saam met die Kerk wêreldwyd hande te vat om aan behoeftes soos dié van Bekele aandag te skenk en ’n generasie Christelike leiers op te lei om die hele Evangelie aan die hele wêreld te bring.

Huidige leierskapsontwikkeling en kerkplanting in Afrika

Leierskapsontwikkeling

TWR saai in Zimbabwe ’n program met die naam Tools for Wise Leadership uit, wat deur Phineas Dube vervaardig word. Phineas het as hoërskool-leerling ’n Bybel ontvang en was verstom deur die wysheid van God in teenstelling met die “wysheid” van die wêreld. Hy het begin bid dat die Here hom goddelike wysheid sal gee.

Dekades later, wanneer mens nou na Phineas se besondere begrip van die lewe luister en sien hoe God hom nie net in Zimbabwe nie, maar ook internasionaal in lering gebruik, is dit duidelik dat die Here sy gebed beantwoord het. Ten spyte van die politieke en ekonomiese uitdagings van die land wend baie inwoners hulle na die Here.

Baie luisteraars spreek hulle dankbaarheid oor die program uit. Die algemeenste versoek is om die bood­skappe in skriftelike vorm te ontvang sodat hulle die waardevolle inligting met ander kan deel.

Cross Roads

TWR het ’n vennootskap met die South African Theological Seminary aangegaan ten einde dissipelskapsprogramme te vervaardig om pastore in Afrika op te lei. TWR beplan om in Junie die eerste van ’n reeks programme genaamd Cross Roads uit te saai. Van die temas in die reeks is “Grounded in God”; “Reflecting Jesus”; “Jesus’ life and legacy” en “Growing in God”. Die programme is in Afrika-Engels en is gemik op predikers en kerkleiers wat nie toegang tot ’n Bybelskool of formele opleiding gehad het nie.

TWR-SA in vennootskap met Mentorlink International

TWR-SA het in konsultasie met Mentorlink International ’n vennootskap gesluit waar Mentorlink opleiding verskaf oor die proses en beginsels van mentorskap, terwyl TWR die radiokomponent daarvan sal ontwikkel. Die projek voorsien om kerkleiers en leraars bymekaar te bring en hulle bloot te stel aan die konsep van ’n dienende leier, soos wat ons Here Jesus geleer en toegepas het.

In Februarie dié jaar het TWR-SA as gasheer opgetree tydens die opleiding van 23 leraars in die volledige Mentorlink-program. Daar is toe saamgestem dat daar ’n groot behoefte bestaan aan ’n 30-minuut radioprogram om die proses van mentorskap te bevorder. Die inhoud van die program behels lering en dramatisering van die materiaal, terwyl inbel-geleenthede en besprekings ook ingebou sal word.

Kerkplanting

Na sowat 35 jaar van radio-uitsendings in Afrika, kan TWR steeds getuig van dit wat die Here deur kerkplanting en die verandering van algehele gemeenskappe d.m.v. die Evangelie doen. Ter voorbeeld, in Mosambiek met sy 17 miljoen inwoners is die 2,8 miljoen Lomwe-sprekendes van die Zambezi-provinsie van die armste groepe in Afrika. Hulle werk hard vir ’n karige bestaan vanuit landbou.

Hoe het dit dus gebeur dat daar vandag meer as 350 groeiende en ontwikkelende kerke onder die Lomwe is? Die antwoord kan gevind word in die wonder van Christelike radio. In die eerste vier jaar van die Lomwe-uitsendings is meer as 50 kerke deur hierdie radioprogramme geplant. Ons loof die Here vir Sy grootheid!

Brandende vrae: Sleutels tot sukses

Versterk deur suiwer Bybelse lering